Mediebruket

Føredrag på arrangørkonferanse i Førde

Arild Nybø — Thu, 04 Feb 2010 22:00:43 +0000

5. februar heldt eg hyggjeleg føredrag for 60-70 kulturarrangørar frå Vestlandet, hovudsakleg innanfor rytmisk musikk. Føredraget m.m. kan lastast ned her.:

20 spørsmål slo an for Framtidsfylket

Arild Nybø — Thu, 21 Jan 2010 00:20:04 +0000

Mediebruket har laga 20 spørsmål for Framtidsfylket om Sogn og Fjordane, og publisert spørsmåla på Facebook via Start.no. I tillegg er quizen marknadsført i andre sosiale medier på Twitter, LinkedIn og Origo.

Målet var å skape litt merksemd kring påmeldinga til Framtidsfylket Karrieremesser i februar 2010, i Bergen, Oslo og Trondheim.

Vona var at inntil 100 ville ta testen første dagen den låg på nettet. Men alt etter nokre timar hadde meir enn 300 personar svart på alle 20 spørsmåla. Dette er gledeleg mange. Dei som får høg score publiserer resultatet på Facebook-profilen sin, og dermed får quizen ei viral spreiing via sosiale medier. Såleis går resten av marknadsføringa av seg sjølv, og stadig fleire får litt meir kunnskap om Sogn og Fjordane som fylke å gjere karriere i og bu i.

Ta testen her.

Meir enn 300 Sogn og Fjordane-tvittrarar samla

Arild Nybø — Tue, 03 Nov 2009 00:18:49 +0000

Nyleg kom Twitter med ein ny funksjon for å lage lister som kan delast med andre. Eg sette i gang, og har laga ei liste med meir enn 300 tvittrarar i eller frå Sogn og Fjordane, dvs. folk med tilknyting til Sogn og Fjordane, som har ein profil på “mikroblogg”-tenesta Twitter.com.

Klikk her for å sjå Sogn og Fjordane-lista.

Det finst mange fleire tvittrarar i og frå Sogn og Fjordane enn dette, men eg er rimeleg sikker på at eg har fått med meg dei fleste av dei som er mest aktive. Eg kan ikkje garantere at lista er feilfri, så om du står der og meiner du ikkje høyrer til der, kan du varsle meg på @arnybo på Twitter. Og er du på Twitter, men ikkje på lista, er det også fint om du varslar meg. Eg brukar nemleg m.a. denne lista når eg held kurs i sosiale medier i Sogn og Fjordane, og vil vise kursdeltakarane korleis dei raskt kan finne nokon å følgje.

Andre måtar å finne kjentfolk på

Andre lister er å finne på tvitre.no, der det førebels er lister for Sogndal og Førde, i tillegg til bransjelister og andre lister sortert på geografi.

Ein annan måte å finne kjentfolk på er å søke i twitter-meldingar på search.twitter.com, for å sjå kven som tvittrar om det du interesserer deg for. På SocialOomph kan du lagre mange ulike søkeord og få dagleg epostvarsel. Og på Twitter.com kan du søkje etter brukarnamn, føre- eller etternamn, eller firmanamna og merkenamn. Eller du kan få Twitter til å granske Gmail- eller Yahoo-kontoen din for å sjå om nokon av kontaktane dine er på Twitter.

For å finne folk kan du også prøve Tweepz.com og TweepSearch.com.

Når du først har funne nokon å følgje, så klikkar du på deira “Following” og “Followers” og ser kven dei følgjer og kven som følgjer dei. Så klikkar du “Follow” på dei du vil følgje, og dermed er du i gang med å byggje deg eit nettverk. Ver merksam på at å drive direkte marknadsføring / reklame på sosiale medier ikkje er særleg populært, det må gjerast litt meir elegant i så fall.

(Illustrasjon: Scott Hampson)

Varierte førelesingar denne hausten

Arild Nybø — Mon, 19 Oct 2009 21:35:06 +0000

Frå midten av september til midten av oktober har Mediebruket i Førde vore heldig og fått mange spennande førelesingsoppdrag, om alt frå bruk av sosiale medier i konsernsamanheng, marknadsførimg og PR-/profilering via sosiale medier, til å fortelje om eigen forretningside.

På IT-forum Sogn og Fjordane sin Teknologikonferanse på Skei var temaet “Strategisk bruk av sosiale medier, med døme frå Sogn og Fjordane”. Då representantar for Sogn og Fjordane Bondelag og Landbrukssamvirket hadde møte i Sogndal var temaet korleis aktørane i landbruket kan bruke sosiale medier til sin fordel.

På Folkelarm i Oslo var festivalleiarar samla, og då fortalde eg om korleis festivalane kan drive marknadsføring og PR-arbeid året rundt gjennom sosiale medier. Sogn og Fjordane Energi bestilte føredrag til konsernleiinga om moment dei bør ha med i arbeidet sitt for å lage ein ny kommunikasjonsstrategi, og Lotteri- og stiftelsestilsynet fekk føredrag om sosiale medier og sette sjølv i gang umiddelbart med å prøve ut verktøya.

Siste førelesingsoppdrag hittil var i Førde, for Rotary. Temaet var uvant men svært kjekt: Her fekk eg høve til snakke i tre kvarter om Mediebruket og forretningsideen min, til ei godt vaksen og engasjert forsamling, frå eit breidt lag av samfunnslivet.

Alt i alt har det vore ein månad med eit stort spenn i innhald på førelesingane, som også har gjort at eg har måtta oppdatere meg fagleg på alle emne eg har snakka om. Utviklinga går fort på nettet, og mykje av den kunnskapen eg hadde tileigna meg før sommaren i år, måtte reviderast i haust. Men du så artig det er !

Sjå også tilbakemeldingar og referansar.

Mediebruket går inn i kameratskap

Arild Nybø — Mon, 05 Oct 2009 22:26:39 +0000

Mediekameratane

Mediebruket har inngått samarbeid med to andre dyktige medie- og informasjonskonsulentar i Sogn og Sunnfjord: Anne-Mette Hjelle og Anne Margrete Alværn. Saman tilbyr vi rådgjeving og andre tenester innan kommunikasjon, omdømmebygging m.m.. Alle har lang og variert erfaring frå media, informasjonsformidling og internett. Samarbeidet har vi kalla Mediekameratane.

Vi driv kvar våre konsulentselskap, med kvar våre spesialitetar innan kommunikasjon/dialog, informasjonsrådgjeving, og informasjonsformidling. Men ofte ønskjer kundane å kunne få eit breidt spekter av tenester frå same leverandør. I staden for å konkurrere mot kvarandre, vil vi derfor heller samarbeide for å kunne tilby det breiaste og tyngste fagmiljøet innan kommunikasjonsrådgjeving i Sogn og Fjordane.

Vi tek oppdrag over heile landet, i felleskap eller kvar for oss, alt etter kva som passar kunden.

Les meir på mediekameratane.no

Mediebruket har blitt aksjeselskap

Arild Nybø — Fri, 02 Oct 2009 10:46:03 +0000

Mediebruket Arild Nybø starta som eit enkeltmannsføretak i 2003, og tok hovudsakleg oppdrag med scanning av bilete og nyofotografering til kulturhistoriske bøker som Selja Forlag gav ut.

I 2009 vart Mediebruket AS oppretta med føremålet: “Utvikling av internettjenester, konsulentvirksomhet, rådgivning og
annen virksomhet i tilknytning til dette. Selskapet skal også kunne investere i andre selskaper.”

Framlegg til reglar for kommentarskriving i bloggar og debattforum

Arild Nybø — Thu, 24 Sep 2009 20:54:23 +0000

Når eg har halde førelesingar om bruk av sosiale medier for organisasjonar og bedrifter får eg ofte spørsmål om korleis dei bør moderere kommentarar som kjem på f.eks. bedriftsblogg. Mitt svar er at det lettaste er å lage synlege retningsliner på forumet/bloggen, slik at når nokon går over streken så kan de vise til brot på reglane.

Les blogginnlegg med framlegg til reglar.

214 deltok på Teknologikonferansen

Arild Nybø — Thu, 24 Sep 2009 16:02:43 +0000

IT-forum Sogn og Fjordane sin Teknologikonferanse vart avvikla 23. og 24. september 2009, og Mediebruket var blant føredragshaldarane. Her er litt materiell frå konferansen:

PRESENTASJONAR (PDF):

Arne H. Krumsvik (Krumsvik.com), medieforskar: Sosiale medier
Arild Nybø, mediebruket.no: Møt kundane på sosiale medier (med døme frå Sogn og Fjordane)
Atle Hamar: Oppsummering av konferansen
Sjå også IT-forum Sogn og Fjordane

FOTO:
Foto tekne av Arild Nybø, mediebruket.no

BLOGGING:
Eva 2.0 om konferansen

TWITTER:
Twittring med #itsfj

FACEBOOK:
it-forum Sogn og Fjordane

Førelesing om sosiale medier i landbruket

Arild Nybø — Mon, 21 Sep 2009 20:21:03 +0000

Tysdag 22. september heldt eg føredrag om sosiale medier for Samarbeidsrådet for landbruket i Hordaland og Sogn og Fjordane. Dei som deltok kan nedanfor finne lenkjene til dei viktigaste teneste som vart omtala:

Facebook - la brukarane finne deg på Facebook, og del godbitar med dei og venene dine. Inviter til tilskipingar, fanesaker osv.

Origo.no (med lokalsoner og mange tusen temasoner som du finn via søk og når innlegg dukkar opp på lokalsonene). Her kan du blogge, dele bilete, skrive innlegg på soner eller eigen profil, marknadsføre hendingar i kalenderen og bygge ein krets. Torget på NRK Sogn og Fjordane er mykje det same (men her er brukarane ofte anonyme, og det er mange usaklege kommentarar.)

YouTube - del video med heile verda og lim dei inn på bloggen og på Facebook..

Flickr - del foto med heile verda.

MySpace - mykje brukt for å dele kulturproduksjon i lyd og video.

LinkedIn - legg ut CV’en, meld deg inn i relevante fagnettverk. Del det du publiserer i andre nettverk, t.d. blogg.

Twitter - mikroblogging. Finn autoritetar på ditt fagfelt, og bygg opp eit verdsomfemnande nettverk. Del faglege tips og erfaringar. Bruk gjerne engelsk, og følg andre før du prøver sjølv.

Blogger.com er Google si bloggeteneste. Få deg epostkonto på Gmail, bruk docs.google.com til å dele dokument og samarbeide. Wordpress er også svært utbreidd.

Digg.com, Del.icio.us og StumbleUpon - samle og del bokmerke med andre (peikarar til relevante nettstader innanfor eit fagområde).

Søkjeverktøy:

google.com/alert - søkjer på alt på nettet, eller du kan avgrense til enkelte innhaldstypar.

socialoomph.com - verktøy for å søkje i twitter-meldingar. Prøv også tweetscan.com.
Har du spørsmål? Skriv dei gjerne nedanfor, så skal du få svar raskt, eller kontakt meg her.

Meir inspirasjon:

Her er 100 andre sosiale medier. Sjekk dei ut, og søk på emne eller personar du er interessert i.

Og her er fleire argument for kvifor du bør lære deg sosiale medier. Vil du ha endå meir? Sjekk ut denne sida.

I eit enkeltståande føredrag vert det ikkje høve til å gå i djupna på strategiar. Føredraget er meint som inspirasjon for å setje seg ytterlegare inn i fenomenet “sosiale medier”. Strategi er tema på eit heildagskurs som eg skal halde seinare i år. Men for dei som vil kome i gang med å lage ein strategi for bruk av sosiale medier i jobben, kan eg tilrå Chris Brogan sin blogg.

Klikk her for å laste ned ein komprimert versjon av førelesinga.

Tekst og bilete frå E39-konferansen Sogn og Fjordane

Arild Nybø — Tue, 08 Sep 2009 21:38:55 +0000

Jenny Følling frå Stamvegutvalet takkar dei 130 frammøtte på E39-konferansen. Foto: Arild Nybø, mediebruket.no

Mediebruket var leigd inn av Stamvegutvalet for å bistå med teknisk hjelp, med å bruke sosiale medier, referere og fotografere under avviklinga av Stamvegkonferansen E39 Sogn og Fjordane tysdag 8. september 2009.

Tekstar, bilete og føredrag frå konferansen kan lesast og lastast ned her.

Bilete i full storleik kan også lastast ned her.